وبتسأليني بحبك !!

بحبك كون وشط وبحر وسما
وربيع وليل صيف ودفا ف شتا ..

بحبك حياة ونعمة ولقمة هنية
لعيلة ملمومة ف الصبحية ..

بحبك عمل وأمل طريق سفر
جميل ومزروع كله شجر ..

بحبك طفل بيلعب ف حضن امه
فرحان بيها وهيا بتضمه ..

بحبك حب مراهق عند مدرسة بنات بعد الضهرية
مستنيها تخرج يمسك ايديها بخوف .. وحنية ..

بحبك زارع جنب زرعته مستنيها
تطرح ويدعى ويشكر ربه وهو فرحان بيها ..

بحبك فنان بيرسم وتحلى ف عينه اللوحة
بحبك شاعر وبين أيديه المقامات مفتوحة ..

مهندس وسط بنايته فرحان ف شموخ
ولا عالم فضاء بيجهز للرحلة صاروخ ..

حبي ليكي حبيبتي فاق وعدى أي حُب
حُب عمري وفرحته يوم لقى القلب بالقلب ..